Бер күрешү- бер гомер

«Гомер уза аккан сулар кебек, искән җилләр кебек”,- дип яза шагыйрь. Чыннан да, бигрәк тиз үтә шул гомерләр. Шул мизгел кебек узган көннәребездә бер- беребезгә, әйләнә –тирәбездәгеләргә игътибарлы, ихтирамлы булсак иде, газиз туганнар.

30 сентябрьнең ямьле, кояшлы көне Имәнкискә авылы өлкәннәрен мәктәбебезнең зур, якты ашханә залына җыйды. Авыл җирле үзидарәсе, клуб, мәктәп җитәкчелеге тарафыннан оештырылган әлеге мәҗлестә түбәтәйле, горур бабайларыбыз- әтиләребез, ак яулыклы нурлы әбиләребез- әниләребезне күреп чиксез сөенеч хисләре кичердек.

 Куңелгә, җанга яхшы сүз дәва шул. Ул көнне өлкәннәр хөрмәтенә бик күп җылы сүзләр, рәхмәтләр әйтелде, җырлар җырланды, биюләр куелды. Хәер, алар үзләре дә җавапсыз калмадылар: җырладылар, биеделәр, күңелләрендә йөрткән сүзләрен үтемле итеп җиткерә алдылар, арабыздан вакытсыз киткән авылдашларыбыз рухына дога кылдылар. Йөзләреннән, күзләреннән  нур- яктылык  бөркелеп торган олыларыбыз менә шулай очрашты ул көнне. Табын янында бергәләп тәмле чәйләр эчтек, бәлеш- пәрәмәчләрдән, кош телләреннән авыз иттек, күңел рәхәте кичердек.

Кадерле өлкәннәребез! Безнең бүгенге якты көнебез, матур тормышыбызда  өлешегез чиксез, сезнең көчегез, саулыгыгыз, йокысыз төннәрегез  дә бар анда. Зур рәхмәт әйтеп , сезнең алда баш иясе килә. Бәйрәмегез бер генә көн белән  билгеләнсә дә, без сезгә һәр көнне бурычлы.

Хәерле саулыклар, тыныч көннәр, балалар хөрмәте- рәхмәте насыйп булсын үзегезгә.