Татарстан Россия төбәкләре арасында цифрлаштыру дәрәҗәсе буенча икенче урында тора
"Сколково" Мәскәү идарә мәктәбе бәяләвенчә, Татарстан Россия төбәкләре арасында цифрлаштыру дәрәҗәсе буенча икенче урында тора. Бу хакта ТР Министрлар Кабинеты утырышында ТР Министрлар Кабинеты башлыгы Айрат Хәйруллин хәбәр итте.
Шул ук вакытта федерациянең иң диджитлаштырылган субъекты-Мәскәү. Республикада тулаем төбәк продуктында ИТ-тармакның өлеше 2,4% тәшкил итә, ә тулаем ил буенча ул 1% тан артмый, дип билгеләп үтте докладчы.
"Әмма безгә омтылырга урын бар. Алга киткән илләрдә тулаем төбәк продуктында ИТ өлеше 10-12% ка җитә", – дип ассызыклады министр.
Хәйруллин сүзләренә караганда, ел саен мәгълүматлаштыру һәм элемтә өлкәсенә республика бюджеты 2 млрд.сум тирәсе акча сарыф итә. 9 меңгә якын социаль әһәмияткә ия объект бердәм дәүләт мәгълүмат тапшыру челтәренә тоташтырылган.
Татарстан Президенты карары нигезендә, агымдагы елның 20 августына кадәр өстәмә рәвештә 1045 мәктәптә интернет челтәреннән оптик элемтә каналлары чыгачак. Нәтиҗәдә, республикада дәүләт мәктәпләренең 100% ы югары тизлекле Интернет белән тәэмин ителәчәк.
Моннан тыш, төбәк казанышлары арасында министр " Халык контроле" кире элемтә платформасы эшен дә искә алды. Аның аша бирелгән 290 мең мөрәҗәгатьнең 250 меңе уңай хәл ителгән, бу 86% тәшкил итә.
Гражданнарның иминлеген тәэмин итүдә "ГЛОНАСС+112" һәм "Имин шәһәр" системалары җәлеп ителгән. Аларның беренче ярдәме белән көн саен 5 меңгә якын шалтырату эшкәртелә, операторның җавабын көтүнең уртача вакыты җиде-сигез секунд тәшкил итә. Ә видеокамералар ярдәмендә агымдагы елның беренче яртыеллыгында Татарстанда узган елның шул ук чоры белән чагыштырганда (барлыгы 894) 7,7% ка күбрәк җинаять ачылган.
Айрат Хәйруллин шулай ук төрле тармакларда, шул исәптән мәгариф, сәламәтлек саклау, транспорт, юл хуҗалыгы, АСК һәм социаль хезмәтләр турында сөйләде.
Киңәшмәне ТР Премьер-министры Алексей Песошин үткәрде. Анда шулай ук Татарстан Республикасы Президенты Рөстәм Миңнеханов та катнашты.