Быел төгәлләүче авыл хуҗалыгы ярминкәсе 27 декабрьгә күчерелгән

Якшәмбе, 27 декабрьдә, иртәнге сәгать алтыда Татарстан Республикасы Авыл хуҗалыгы һәм азык-төлек министрлыгы республика халкын быел төгәлләүче авыл хуҗалыгы ярминкәсенә чакыра. Бәйрәм ярминкәләре Казанда, Түбән Камада, Чаллыда һәм Яшел Үзән районының Октябрьский поселогында («Яңа Тура»сәүдә-ярминкә комплексы) узачак. Яңа ел алдыннан шәһәр халкы ит, казылык продукциясе, төрле сөт, сыр, май, йомырка, яшелчә, бал, шикәр, он, ярмалар һәм Татарстан муниципаль районнарыннан китерелгән башка фермер продукциясен сатып ала алачак. Исегезгә төшерәбез, 5 декабрьдә Татарстан Премьер-министры Алексей Песошин Авыл хуҗалыгы ярминкәсен якшәмбе көнне, 27 декабрьгә күчерергә тәкъдим итте. Казан, Түбән Кама, Яр Чаллы шәһәрләрендә һәм Яшел Үзән районында үткәрелгән 15 ярминкә нәтиҗәләре буенча барлыгы 1086 млн.сумлык продукция китерелгән һәм сатылган. Шәһәр халкы 1295 тонна ит, 287 тонна сөт, 4,2 млн.данә тавык йомыркасы, 634 тонна он һәм 881 тонна шикәр комы, 23,6 мең тонна бәрәңге һәм яшелчә сатып алган. Төрле мәйданчыкларда ассортиментның үз үзенчәлекләре бар, алар халыкның ихтыяҗларын исәпкә алып төзелгән.