Татар Янтыгы авыл җирлегендә 2020 елда башкарылган эшләргә йомгак ясалды һәм 2021 елга бурычлар билгеләнде
Чара район Башлыгы Илдус Зарипов һәм район прокуроры Юрий Марасов катнашында узды. Төп доклад белән җирлек башлыгы Рәшит Шамиев чыгыш ясады.
Бүгенге көндә Татар Янтыгы авыл җирлегендә яшәү өчен барлык шартлар да бар: мәктәп, мәдәният йорты, почта элемтәсе бүлеге, ФАП, мәчет, кибетләр. 2 крестьян-фермер хуҗалыгы уңышлы үсеш ала, шәхси эшмәкәр эшли, агач эшкәртү белән шөгыльләнә, 7 кеше үзмәшгульлек буларак теркәлгән. Әмма, омтылырга урын бар, җирлектә КФХны үстерү өчен шартлар тудырылган. "Яшьләрнең Татарстан Республикасы Авыл хуҗалыгы һәм азык - төлек министрлыгы программаларында фермер хуҗалыкларына ярдәм итү буенча актив катнашуларын теләр идем", - дип ассызыклады Шамиев.
2020 елда иске су торбалары алыштырылды. Җирлек халкы көче белән 8 чишмә төзекләндерелде. Үзара салым программасы кысаларында юлларны ремонтлау үткәрелде, яңа скважиналар бораулау планлаштырыла.