Авыл хуҗалыгы министрлыгы барлык төп юнәлешләр буенча фермер продукциясен җитештерүнең уңай динамикасын саклап калуны көтә
Бу хакта Россия авыл хуҗалыгы министры Дмитрий Патрушев 17 февральдә Россия крестьян (фермер) хуҗалыклары һәм авыл хуҗалыгы кооперативлары ассоциациясенең XXIII съездының пленар утырышында белдерде.
Илнең 70 төбәгеннән делегатлар, шулай ук Россия Федерациясе Авыл хуҗалыгы министрлыгы, башка ведомстволар һәм тармак дәүләт компанияләре җитәкчеләре катнашкан чарада фермер хәрәкәте перспективалары, кече хуҗалыкларга дәүләт ярдәме чаралары һәм авыл территорияләрен үстерү турында фикер алыштылар.
Авыл хуҗалыгы министрлыгы башлыгы чарада катнашучыларга Россия Федерациясе Хөкүмәте Рәисе Михаил Мишустинның сәламләү адресын укыды. Премьер-министр сүзләренә караганда, фермерлыкка һәм кооперациягә ярдәм итү - дәүләт сәясәтенең өстенлекле юнәлешләренең берсе. Хөкүмәт алга таба да кече хуҗалыкларны үстерүгә, административ киртәләрне киметүгә җитди игътибар бирәчәк, яңа эшкуарлар барлыкка килүгә этәргеч бирәчәк, аграрийлар өчен уңай шартлар тудырылачак.