Татарстанда авыл хуҗалыгы ярминкәләре 10 сентябрьдә эшли башлаячак

2022 елның 25 августы, пәнҗешәмбе

Татарстанда авыл хуҗалыгы ярминкәләре 10 сентябрьдә ачылачак, аларның эше 24 декабрьгә кадәр дәвам итәчәк. Тиешле күрсәтмәне ТР Премьер-министры Алексей Песошин имзалады.

Муниципалитетларга фермер продуктлары белән сәүдә итү урыннарын билгеләргә, шулай ук әлеге мәйданчыкларда куркынычсызлыкны тәэмин итү өчен чаралар күрергә кушылган. Татарстан Республикасы Авыл хуҗалыгы һәм азык-төлек министрлыгы һәм районнар башлыклары авыл хуҗалыгы продукциясен ярминкә мәйданчыкларына кайтаруны тәэмин итәргә тиешләр.

Терлекчелек продукциясенең керүен һәм сатылуын Татарстан Республикасы Министрлар Кабинетының Баш ветеринария идарәсе белгечләре тикшереп торачак.