Лаеш районында юл хәрәкәте иминлеге мәсьәләләре буенча фикер алыштылар
Лаеш районында юл хәрәкәте иминлеген тәэмин итү комиссиясенең аварияләрне анализлауга һәм юлда, шул исәптән балалар травматизмын киметү буенча күрелә торган чараларга багышланган киңәйтелгән утырышы булды. Чарада Лаеш районы Башлыгы Илдус Зарипов, Россия Эчке эшләр министрлыгының Лаеш районы буенча бүлеге начальнигы Рәдиф Баһавиев, юл хәрәкәте иминлеге комиссиясе рәисе Азат Нурмөхәммәтов, Татарстан Республикасы буенча Эчке эшләр министрлыгы ЮХИДИ юл-патруль хезмәтенең аерым махсуслаштырылган батальоны командиры Айрат Исмәгыйлев, мәгариф учреждениеләре вәкилләре, шулай ук авыл җирлекләре башлыклары катнашты.
Төп мәсьәләләрнең берсе аварияләр статистикасы булды, аның нигезендә агымдагы елның 9 аенда район территориясендә 13 кеше һәлак булган, бу узган елның шушы чоры күрсәткечләреннән ике тапкыр артык (6 кеше һәлак булган). Бу хакта Рәдиф Баһавиев хәбәр итте.
Район башлыгы Илдус Зарипов игътибарны балаларның иминлегенә юнәлтте: «безнең юллардан көн саен 42 мәктәп автобусы йөри, алар күп санда балаларны йөртә. Аларның иминлеген тәэмин итү-безнең өстенлекле бурычыбыз. Без һәр юл-транспорт һәлакәтен тикшерәбез һәм һәлакәт сәбәпләрен бетерү буенча конкрет чаралар күрәбез». Агымдагы елда мәгариф учреждениеләре янында җәяүлеләр кичүләрен төзекләндерүгә, юл билгеләре, ясалма тигезсезлекләр һәм яктырту урнаштыруга аерым игътибар бирелүе билгеләп үтелде.
Айрат Исмәгыйлев республика буенча гомуми статистика китерде, хисап чорында Татарстанда 229 кеше, шул исәптән 11 бала һәлак булды, дип билгеләп үтте.