Лаеш районы архив проектларының республика конкурсында җиңде
Лаеш районының архив секторы, архив документларын популярлаштыру проектын яклап, ел саен үткәрелә торган республика конкурсында җиңүчеләрнең берсе булды. Республиканың 20 муниципалитеты арасында Лаеш районы архив эшен үстерү өчен заманча җиһазлар алачак.
2025 елның октябрь башында Татарстанда «Татарстан Республикасында архив эшен үстерү» дәүләт программасы кысаларында проектларны ачыктан-ачык яклау узды. Конкурс ТР Архив эше буенча Дәүләт комитеты тарафыннан тугызынчы тапкыр үткәрелде.
20 муниципаль район заманча җиһазлар: видеокамералар, планета сканерлары, фотоаппаратлар һәм сенсорлы экранлы мәгълүмат өстәле алырга дәгъва итүче 22 проект тәкъдим итте.
Яклау өч номинация буенча узды. Лаеш районы Азнакай, Югары Ослан һәм Биектау районнарының архив секторлары белән бергә «Россия Федерациясе Архив фонды документларын һәм башка архив документларын популярлаштыру һәм куллану проектларына ярдәм» номинациясендә җиңү яулады.
Архив эше буенча ТР Дәүләт комитеты рәисе урынбасары Гүзәл Илдарханова-Балчиклы: «Безнең фикеребезчә, бик мөһим конкурс — безнең архивлар өчен алдынгы һәм заманча җиһазлар алу мөмкинлеге бирә торган һәм һәр хезмәткәрнең һөнәри үсешенә ярдәм итә торган конкурс! Көрәш лаеклы булды! Иң көчлеләр һәм әлеге җиһазны куллану кирәклеген исбатлаучылар җиңде!»
Чара алдынгы архив технологияләрен кертүгә, заманча җиһазларны үзләштерүгә, уңай тәҗрибә таратуга һәм муниципаль архив хезмәткәрләренең һөнәри үсешенә юнәлдерелгән.
Башка номинацияләрдә җиңүчеләр булдылар:
— Документларның сакланышын тәэмин итү номинациясендә — Арча, Баулы, Чүпрәле, Мөслим, Балык Бистәсе һәм Теләче районнарының архив секторлары.
— Архив фондын аудиовизуаль документлар белән тулыландыру номинациясендә — Әлмәт, Бөгелмә, Питрәч һәм Теләче муниципаль районнары.