Лаеш районында капиталь ремонттан соң Зур Кабан авыл мәдәният йорты ачылды
Зур Кабан авылында капиталь ремонттан соң авыл мәдәният йорты ачылды. Яңартылган бинада Лаеш районы башлыгы Илдус Зарипов булды.
Зур Кабан авыл мәдәният йорты 2014 елда төзелгән. Тамаша залы 300 урынга исәпләнгән. Авыл өчен бу — патриотик, гаилә һәм эстетик тәрбия, сәламәт яшәү рәвешен пропагандалау, Татарстан Республикасы язучылары һәм шагыйрьләре иҗатын популярлаштыру уза торган тартылу ноктасы. Мәдәният йорты базасында 21 клуб берләшмәсе оештырылган, аларда даими рәвештә 231 кеше шөгыльләнә.
«Безнең өчен авыл мәдәният йортының чыннан да уңайлы, заманча һәм яраткан булуы бик мөһим. Шуңа күрә быел бина тулысынча яңарды. Килеп керүчеләр өчен уңайлырак һәм җәлеп итәрлек булды», — диде ачу тантанасында район башлыгы Илдус Зарипов.
Капиталь ремонт кысаларында фасад, түбә, тәрәзәләр һәм ишекләр, пандуслы керү төркемнәре яңартылды, интерьер һәм тәмханалар тулысынча ремонтланды, барлык инженер челтәрләре — электр тәэминаты, җылыту, вентиляция, суүткәргеч һәм канализация алыштырылды. Өстәмә рәвештә мебель, җиһазлар һәм инвентарь сатып алынды, тирә-як территория төзекләндерелде.
Бәйрәмдә район башлыгы Татарстан Республикасы Рәисе Рөстәм Миңнеханов Указы белән гамәлгә куелган электрон дан тактасы лауреаты сертификатларын тапшырды. Шуның белән район буенча сертификатлар тапшыру тәмамланды. Барысы Лаеш районыннан дан тактасына 96 оешмадан 282 лауреат кертелгән.
Зур Кабан авыл мәдәният йортын ачу «Тормыш өчен инфраструктура» милли проектының максатларына һәм бурычларына туры килә.