2020 елда 50 дәүләт программасы гамәлгә ашырылды
2020 елда якынча 100 миллиард сумнан артык суммага 4,5 мең объект төзелде, ремонтланды һәм реконструкцияләнде. Әлеге мәгълүматларны Татарстан Республикасы Төзелеш, архитектура һәм торак-коммуналь хуҗалык министрлыгы коллегиясенең йомгаклау утырышында Татарстан Төзелеш министрлыгы башлыгы Марат Айзатуллин җиткерде.
Шунысын да билгеләп үтәргә кирәк, 2020 ел республиканың 100 еллыгы эгидасы астында узды. "Илдәге эпидемиологик вәзгыятькә карамастан, юбилейга әзерлек кысаларында куелган бурычларны төзүчеләр лаеклы үтәде. Казанда Сәет Галиев исемендәге мәдәният сарае реконструкцияләнде, Европада иң зурлардан саналган «Урам» яшьләр экстрим-паркы ачылды. Шулай ук Җиңүнең 75 еллыгына башкаланың Җиңү паркында төзекләндерү эшләре башкарылды, «Казан»милли-мәдәни үзәге бинасы реконструкцияләнде. Ике мөһим объект «Адымнар – белемгә юл» белем бирү проекты кысаларында файдалануга тапшырылды, ул Татарстан Республикасының Беренче Президенты Минтимер Шәрип улы Шәймиев инициативасы белән гамәлгә ашырыла. Казан Изге Ана иконасы соборында төзелеш-монтаж эшләре тәмамланды. Хәзер храмда тарихи сызымнар һәм фотоматериаллар буенча фасад иконалары һәм архитектура декоратив бизәнү әйберләре яңадан торгызыла", - диде ведомство башлыгы.
Марат Айзатуллин күп фатирлы йортларны капиталь ремонтлау темасына аерым игътибар бирде. "Хисап елында капиталь ремонт программасы буенча 1063 күпфатирлы йорт ремонтланды. 900дән артык объект коммуналь инфраструктураны модернизацияләү программасы кысаларында ремонтланган һәм төзелгән".