Рождествено авыл җирлегендә узган елга йомгак ясадылар
Рождественское авылында 2019 елга йомгак ясадылар һәм агымдагы елга бурычлар билгеләделәр. Җыен Лаеш районы Башлыгы Илдус Зарипов катнашында узды. Башкарылган эшләр турында авыл җирлеге башлыгы Сергей Гуцу хисап тотты. Ул крестьян-фермер хуҗалыкларының, кече һәм урта бизнесның тотрыклы үсешен билгеләп үтте. Эшмәкәрләр үз акчаларын үз бизнесларына гына түгел, ә авылны төзекләндерүгә дә салалар, дип сөйләде ул. Аерым алганда, Пятловода паркны төзекләндерү буенча эш башкарылды, коры агачлар һәм куаклар киселде, җәяүлеләр юллары төзекләндерелде, ике керү төркеме төзелде, яктырту фонарьлары куелды.
Докладчы сүзләренә караганда, Уңайлы мохит булдыру – җирлек җитәкчелеге алдында торган иң мөһим бурычларның берсе. Узган ел Дятловода даруханәгә кадәр юл төзекләндерелде. Комсомол урамыннан Мәктәп урамына кадәр булган тыкрыкны ташладылар. Яшьлек урамында авария хәлендәге бинаны сүттеләр, төзелеш чүп-чарын чыгардылар һәм тирә-юньне чистарттылар. Рождественода Иске клубтан төзелеш чүп-чарын чыгарганнар. Элеккеге Сингел мәктәбе территориясендә иске биналар, агачлар җыештырылды, бөтен чүп-чар чыгарылды.
Булачак балалар мәйданчыгы өчен нигез ясалган. «Юл хәрәкәте иминлеге» программасы буенча Сингәләдә Клуб урамы буенча юл-урам челтәренә ремонт ясалган, ятып торучы полицейскийлар һәм кирәкле юл билгеләре куелган.
Үзара салым программасы ярдәмендә 2019 елда Рождествено авылында иске зиратны төзекләндерү эшләре башкарылды. 2020 елга үзара салым программасы гражданнар җыены нәтиҗәләренә карап формалашты. Җыелган акчаларны, республика акчаларын исәпкә алып, Рождественода, Тангачи, Дятловода урам-юл челтәрен ремонтлауга, ә Сингелдә балалар мәйданчыгын һәм якын - тирә территорияне төзекләндерүгә юнәлдерү планлаштырыла.
Район җитәкчесе Илдус Зарипов Рождествено авыл җирлеге администрациясе һәм хезмәтләренең халык өчен уңайлы мохит булдыруга юнәлтелгән эшчәнлеген уңай бәяләде.
Белешмә өчен: Рождествено авыл җирлегендә 1270 кеше язылган. Мәдәни-әхлакый тәрбия югары үсеш алган. Узган ел авылда беренче тапкыр Ислам Сабантуе узды. Оештыручы булып элеккеге тоткыннарны тернәкләндерү һәм адаптацияләү үзәге генераль директоры Азат Гайнетдинов чыгыш ясады. Бәйрәмдә Татарстан мөфтие Камил хәзрәт Сәмигуллин, Лаеш районы суды рәисе Мәгънәви Гәрәев, шулай ук 25 имам катнашты.
Җирлектә уңайлы яшәү өчен барлык шартлар да тудырылган: почта һәм Саклык банкы бүлеге, сигез кибет, даруханә, ике ФАП, Рождественская табиблык амбулаториясе эшли. Капиталь ремонттан соң мәктәп, «Капелька» балалар бакчасы уңышлы эшләп килә. Яңа клуб, китапханә бар.
ТАССР төзелүнең 100 еллыгына һәм Бөек җиңүнең 75 еллыгын бәйрәм итүгә әзерлек буенча чаралар үткәрелә.