ЯҢАЛЫКЛАР

Бу көннәрдә республикабызда шагыйрь Габдулла Тукайның тууына 130 ел тулу уңаеннан төрле чаралар оештырыла. 28 апрельдә район мәдәният йортында №2 Лаеш урта гомуми белем бирү мәктәбенең өченче “А” сыйныф укучылары һәм “Эксперимент” театраль студиясе белән шигърият кичәсе узды.

2 нче сыйныфның тимур отряды үз карамагы астындагы Никифорова Александра Александровнада кунакта булып кайтты. Балалар аның йорт алдын тәртипкә китерде. Александра Александровна герой-шәһәрләргә сәфәр кыла торган булган. Бүген ул мәктәп музееына Бөек Ватан сугышының герой-шәһәрләре турындагы фото һәм альбомнарны тапшырды.

27 апрельдә Г.Р.Державин исемендәге Лаеш крае музеенды “Тукай йолдызлыгы” дигән укучылар конкурсы узды. Лаеш шәһәренең №2 мәктәбе укучылары Габдулла Тукайның поэмаларын, шигырьләрен яттан сөйләде, шулай ук шагыйрьгә багышланган үзләре иҗат иткән татарча һзм рус телләрендәге сочинениеләрен укыды.

26 апрельдә Г.Р.Державин исемендәге Лаеш крае музеенда Лаеш шәһәренең №2 мәктәбе укучыларының эшләре тәкъдим ителгән “Без Тукайлы халык” дигән күргәзмә оештырылды. Балалар Габдулла Тукайның әсәрләрен рәсемнәрдә чагылдырды. Табигый материаллардан Тукай әкиятләре геройлары ясадылар.

26 апрельдә Державино авылы китапханәсе мәктәп белән берлектә бөек татар шагыйре Габдулла Тукайның туган көненә багышланган туган тел һәм шигърият көне уздырдылар. Китапханәче А.Шәвәлиева шагыйрьнең тормышы турында сөйләде, Тукайның әкиятләрендә нигезләнгән әдәби викторина оештырды. Балалар шигырьләр укыды, Тукайның әсәрләрен сәхнәләштерде. Алар аеруча аның “Шүрәле” әкиятен мөкиббән китеп карадылар.

26 апрельдә “Музейлар язы” акциясе кысаларында КАРАВОН тарихы музеенда традицион булган БАРОК исемле хатын-кыз зиннәтле әйберен ясау буенча мастер-класс үткәрелде. Никольское авылы клубы мөдире Галина Германова җитәкчелегендә балалар һәм өлкәннәр бисердан зиннәтле әйберләр ясады, шул вакытта “На горе-горе”, “Как по синему морю” җырларын башкардылар.

26 апрельдә мәктәптә сөекле шагыйребез Г. Тукайның тууына 130 ел булуга багышланган әдәби- музыкаль кичә үткәрелде. Кичә шагыйрьнең тормыш юлы, иҗаты белән таныштыру, шигырьләр, җырлар белән үрелеп барды. Башлангыч сыйныф укучылары Тукай әсәрләрен сәхнәләштереп тә күрсәттеләр. Кичәне татар теле һәм әдәбияты укытучысы Зиганшина Г. Н. әзерләде.

Габдулла Тукайның туган көнендә Нармонка авылы клубында китапханә белән берлектә бәйрәм чарасы үткәрелде. Балалар шагыйрьнең биографисе белән танышты, аның шигырьләрен укыдылар, табышмаклар чиштеләр, викториналарда актив катнаштылар. Ахырда барысы да кушылып, “И туган тел” җырын башкардылар. Чара табын алдында тәмамланды.

26 апрельдә Яр Чаллыда “Серле сандык” исемле әдәби уку буенча милли иҗади төбәк фестивале узды. Анда Кече Елга авыл клубындагы милли театр режиссеры Равилә Вәлиуллина кулы астында шөгыльләнүче “Әдәби сүз” түгәрәгенә йөрүчеләр чыгыш ясады. Аларның чыгышларын жюри югары бәяләде. Һәр катнашучы үз төрле номинацияләрдә җиңүгә иреште һәм фестивальнең соңгы этабына чакыру алды.

Бөек татар шагыйре Габдулла Тукайның тууына 130 ел булу уңаеннан “Алтын көз” социаль ярдәм күрсәтү комплекс үзәгендә тәрбияләнүче Роза Габдулла кызы Хәсәнова Державино урта мәктәбе укучыларын үзенә кунакка чакырып, шигърият бәйрәме оештырды. Укучылар Габдулла Тукайның шигырьләрен һәм әкиятләрен укыды, ә Роза Гадбулловна үзе иҗат иткән шигырьләрне сөйләде.